Beth Nesaf? 10 Peth i Wneud ar ôl Arholiadau
Mae tymor arholiadau wedi dod i ben! Llongyfarchiadau i ti am oroesi’r holl oriau o baratoi am yr arholiadau a’r straen. Dyma dy gyfle i ymlacio a threulio amser gyda ffrindiau a theulu heb deimlo’n euog am gymryd saib o’r adolygu!
This article is also availaible in English – click here
Nawr bod gen ti ychydig o amser rhydd, efallai nad wyt ti’n sicr beth i wneud gyda’r amser yma. Efallai dy fod di wedi diflasu neu’n poeni am y camau nesaf cyn diwrnod canlyniadau. Dyma ganllaw am wneud y gorau o dy amser ar ôl yr arholiadau.
1. Ymlacio
Dim mwy o danlinellu nodiadau adolygu, creu cardiau fflach neu lenwi hen bapurau yn wyllt. Heb straen arholiadau gallet ti nawr ymlacio ac anadlu. Dyma gyfle i longyfarch dy hun am yr holl waith caled, a chaniatáu i dy gorff a dy feddwl ymlacio.
2. Cer allan
Rwyt ti’n rhydd o’r ddesg o’r diwedd! Ceisia fwynhau ychydig o’r tywydd brafiach a chynhesach (🤞 🙏🏽). Cer am dro i’r parc neu draeth, mynd am bicnic, neu gynnig cerdded ci’r cymydog.
3. Ymarfer hunanofal
Mae hunanofal yn ymwneud â gofalu am dy hun. Nid oes rhaid treulio oriau yn y bath, yn lleithio’r croen, ac yn bwyta 5 y dydd (er gall hynny helpu). Gall hunanofal feddwl gwneud rhywbeth rwyt ti’n ei fwynhau, fel chwarae gemau fideo, sglefyrddio neu grefftau.
4. Cyfarfod gyda ffrindiau
Dyw’r ffaith bod yr arholiadau wedi dod i ben, ac rwyt ti wedi gorffen yn yr ysgol, chweched dosbarth neu goleg, yn golygu nad wyt ti’n gallu gweld dy ffrindiau. Gyrra neges a gofyn i gael cyfarfod neu chwilia am ffyrdd i wneud ffrindiau newydd.
5. Amser teulu
Efallai mai dim ond amser swper oeddet ti’n gweld dy deulu yn ystod yr arholiadau. Ymdrecha i dreulio mwy o amser gyda’r bobl rwyt ti’n byw â nhw. Gallech chi gynllunio i fynd allan â’ch gilydd neu ddangos gwerthfawrogiad wrth helpu o gwmpas y tŷ. Cysyllta gyda theulu sydd yn byw yn bellach i ffwrdd a’u diweddaru ar yr hyn sydd yn digwydd yn dy fywyd.
6. Mynd ar wyliau
Gall mynd ar wyliau gyda ffrindiau fod yn ffordd wych i ymlacio a dathlu. Ond, cofia fod yn ddoeth, yn ddiogel ac i aros mewn grŵp. Os wyt ti’n mynd ar wyliau, sicrha dy fod di’n:
- Gwirio bod y bobl rwyt ti’n teithio â nhw yn iawn
- Mynd i lefydd fel pâr neu grŵp
- Bod yn ymwybodol o’r hyn sydd o gwmpas, yn enwedig yn hwyr yn y nos
- Aros yn bell o ochrau adeiladau a chlogwyni
- Cadw eiddo yn ddiogel, yn enwedig pasbort ac ID, arian, ffôn a manylion yswiriant teithio
- Dilyn cyfarwyddiadau diogelwch os wyt ti’n gwneud rhywbeth anturus
Mae Ymgyrch Tom: Byddwch yn Ddoeth, Byddwch yn Ddiogel ac Arhoswch Mewn Grŵp wedi ei lansio ar Hwb yn ddiweddar. Ei fwriad yw addysgu pobl ifanc ar sut i gadw’n ddiogel ac i osgoi sefyllfaoedd peryglus wrth fynd dramor gyda ffrindiau am y tro cyntaf. Mae’n rhannu stori Tom Channon o Gaerdydd a fu farw’n drasig yn 2018 pan aeth ar wyliau gyda ffrindiau yn dilyn arholiadau Lefel A. Bydd yr ymgyrch yn cael ei gyflwyno i fyfyrwyr 16-18 oed mewn ysgolion a cholegau ledled Cymru. Clicia yma i wylio fideo o rieni Tom yn siarad am eu mab a’r ymgyrch.
7. Cychwyn meddwl am y camau nesaf
Efallai dy fod di’n dechrau meddwl beth nesaf ar ôl TGAU, coleg a Lefel A, neu’r brifysgol. Mae’n dda paratoi am wahanol ganlyniadau pan ddaw. Meddylia am yr hyn hoffet ti ei wneud nesaf a beth allet ti ei wneud os nad yw pethau’n mynd cystal ag yr oeddet ti wedi’i obeithio. Efallai bydd yn fuddiol i ti feddwl am y dyfodol ac os hoffet ti gael ychydig o brofiad gwirfoddoli neu swydd.
8. Creu CV
Mae posib gyrru CV i lefydd byddet ti’n hoffi gweithio neu i helpu cael profiad gwaith. Mae’n ddogfen sydd yn dangos dy sgiliau, profiad ac addysg. Bydd creu CV pan mae gen ti amser rhydd yn arbed llawer o straen yn hwyrach ymlaen pan fyddi di ei angen. Mae posib ei ddiweddaru gyda dy raddau ar ôl i ti dderbyn canlyniadau’r arholiadau.
9. Trefnu dy ofod
Mae glanhau dy ystafell a threfnu dy bethau yn gallu helpu dy roi mewn ffrâm meddwl dda. Gall hyn fod yn amser da i drefnu hen lyfrau ysgol a nodiadau. Creu lle i’r camau nesaf yn dy siwrne. Ond, paid bod yn fyrbwyll yn taflu nodiadau neu adnoddau astudio eto – efallai y bydd yn ddefnyddiol yn y dyfodol neu byddi di ei angen i ail-eistedd arholiad.
10. Siarad â Meic
Meic yw’r llinell gymorth gwybodaeth, cyngor ac eiriolaeth i blant a phobl ifanc ledled Cymru. Cysyllta os wyt ti angen siarad â rhywun am unrhyw beth sydd yn dy boeni. Mae’n gyfrinachol ac am ddim. Mae’r gwasanaeth yn agored rhwng 8yb a hanner nos pob dydd, ac mae posib cysylltu ar y ffôn, neges testun neu sgwrs ar-lein.
Gwybodaeth Berthnasol
Canlyniadau TGAU – Beth Sy’n Digwydd a Beth Nesaf?
