Taclo Euogrwydd Cymryd Brêc O’r Adolygu
Pan mae gen ti arholiadau ar y gweill, gall fod yn anodd iawn canolbwyntio ar unrhyw beth arall. Bwriad y blog yma yw dangos sut i gael cydbwysedd cywir rhwng adolygu ac ymlacio a pam bod hynny’n bwysig.
Mae gan Meic lawer o flogiau a chyngor i helpu ti trwy gyfnod yr arholiadau – cer yma i weld.
Yn aml mae yna lawer o bwysau i lwyddo gan athrawon, rhieni/gofalwyr, a ti dy hun. Rwyt ti’n deall yn iawn fod angen i ti adolygu. Mae’n ffordd wych i baratoi at arholiadau, ond tra bod rhai yn ei chael yn anodd cychwyn, i eraill mae’n anodd stopio!
Cydbwysedd
Wrth roi pwysau ar dy hun i wneud cymaint o adolygu ag y medri di, efallai nad wyt ti’n cymryd digon o amser i ffwrdd. Efallai dy fod di’n teimlo’n euog os wyt ti’n cymryd brêc sydd wir ei angen, ac yn dechrau poeni am yr holl waith sydd ar ôl.
Ond, mae’n hynod bwysig i ti roi amser i orffwys, ymlacio ac adlewyrchu pan, fel nad wyt ti’n suddo dan y pwysau. Gall hynny arwain at fwy o straen, poeni a thymer isel. Gall hyn fod yn anodd ymdopi ag ef yn ystod yr arholiadau, yn ogystal ag arwain at sesiynau adolygu llai effeithiol.
Rhaid cael cydbwysedd rhwng amser gweithio ac amser ymlacio i oroesi cyfnod yr arholiadau. Mae’r blog yma yn rhannu cyngor pwysig i ti lwyddo cael y cydbwysedd cywir i gadw’r meddwl yn hapus ac yn iach.
1. Ansawdd nid amlder
Beth yw pwynt treulio oriau’n adolygu heb frêc pan mae’r meddwl yn crwydro ar ôl cyfnod. Ceisia adolygu mewn talpiau llai, a chymryd brêc yn rheolaidd yn lle hynny. Mae’r Dechneg Pomodoro yn ddull llwyddiannus, sef gweithio am 25 munud ac yna 5 munud o frêc. Efallai dy fod di’n adolygu am lai o amser, ond mae cymryd saib yn ei wneud yn fwy effeithiol.
2. Dathlu cynnydd
Mae’n hawdd canolbwyntio ar faint sydd ar ôl i’w wneud, yn hytrach nag dathlu yr hyn rwyt ti wedi llwyddo. Nid oes angen i ti boeni os wyt ti’n anghofio ychydig o fanylion astudiaeth achos, neu’n ateb ychydig o gwestiynau ymarfer yn anghywir. Gwneud cynnydd yw pwrpas adolygu, ta waeth pa mor fach yw hyn, yn hytrach nag anelu i fod yn berffaith.
3. Adlewyrchu ac Adolygu
Efallai mai adolygu yw prif ffocws y cyfnod arholiadau, ond mae gwneud nodiadau a llenwi hen bapurau arholiad drwy’r dydd, bob dydd, yn sicr o gael effaith negyddol arnat ti. Mae adolygu yn fwy nag cloi dy hun yn dy ystafell ac ymgolli yn y llyfrau. Nid yw’r meddwl na’r corff yn gallu gweithio’n effeithiol heb ymlacio, gorffwys ac adlewyrchu.
4. Amser am hwyl
Paid gadael i’r ffaith dy fod di’n meddwl y dylet ti fod yn adolygu dy stopio rhag gwneud y pethau rwyt ti’n hoffi a threulio amser gyda’r bobl sydd yn gwneud i ti deimlo’n dda. Rho amser i adolygu wrth gwrs, ond rho amser i’r pethau eraill hefyd. Mae edrych ymlaen at bethau, rhwng yr adolygu, yn gallu ysgogi a helpu ti i gael y cydbwysedd gwaith-bywyd perffaith yn ystod cyfnod arholiadau.
5. Gwrando ar dy hun
Mae pawb yn cael diwrnodau pan fydd adolygu yn teimlo’n anobeithiol, ac mae hynny’n iawn. Gwranda ar yr hyn mae dy gorff a dy feddwl yn ceisio dweud wrthyt ti. Rho dro ar wneud rhywbeth rwyt ti’n mwynhau. Bydd yn helpu ti i adfer yr egni sydd ei angen i adolygu rhyw dro eto.
6. Dim euogrwydd
Os wyt ti’n mynd allan am y dydd, a ddim yn gallu adolygu, paid mynd i banig. Mae arholiadau yn bwysig, ond mae angen byw o hyd. Rwyt ti’n haeddu mwynhau amser yn gwneud pethau gwahanol. Nid yw’n fuddiol teimlo’n euog am gymryd amser o’r adolygu. Ni fydd yn gwneud i ti adolygu’n well y tro nesaf rwyt ti’n mynd ati, ond bydd yn rhoi ti mewn meddylfryd negyddol. Mae’n haws dweud nag gwneud, ond ceisia beidio teimlo’n euog am gymryd brêc o’r adolygu, hyd yn oed os yw’n frêc hir.
7. Dim ond gwneud dy orau fedri di
Cofia, dyw’r ffaith nad wyt ti’n adolygu drwy’r dydd, bob dydd, ddim yn golygu dy fod di’n fethiant. Mae gormod o adolygu heb frêc yn gallu bod yn wrthgynhyrchiol. Gwna dy orau yn yr arholiadau, sicrha dy fod di mewn meddylfryd da. Bydd hynny’n digwydd wrth gymryd amser i fywiogi’r corff a’r meddwl, yn hytrach nag gorfodi dy hun i adolygu o hyd. Mae ymlacio yn ysgogi!
Lefel Nesa
Cer draw i wefan Lefel Nesa. canllawiau arholiadau ac asesu, cyngor gyrfaoedd ac awgrymiadau lles ar gyfer dysgwyr yng Nghymru. Mae Gyrfa Cymru, E-sgol, Cymwysterau Cymru, CBAC a Llywodraeth Cymru wedi gweithio mewn partneriaeth i ddarparu llawer o adnoddau ychwanegol i helpu dysgwyr sydd yn cymryd arholiadau ac asesiadau eleni.
Cysyllta â Meic
Mae arholiadau ac asesiadau yn gallu bod yn anodd ar unrhyw un. Weithiau efallai byddet ti’n hoffi siarad am bethau gyda rhywun fel nad yw pethau yn dod yn ormod o bwysau. Mae Meic yma i ti bob dydd rhwng 8yb a hanner nos. Bydd ein cynghorwyr cyfeillgar yn gwrando ac yn cynnig gwybodaeth, cyngor ac eiriolaeth gyfrinachol ac am ddim. Cysyllta ar y ffôn (080880 23456), neges testun (84001) ac ar y we.
