Yma i Ti Dros y Nadolig a’r Flwyddyn Newydd
Mae llawer o bobl yn edrych ymlaen at y Nadolig. Gweld teulu, bwyta llawer o fwyd, chwarae gemau, rhoi anrhegion. Ond mae’r adeg yma o’r flwyddyn yn gallu bod yn anodd iawn i lawer hefyd, wrth iddo fwyhau’r pethau sy’n ein gwneud yn drist neu’n flin.
To read this article in English, click here
Mae teuluoedd yn teimlo dyletswydd i dreulio amser â’i gilydd dros y cyfnod yma, ac yn aml gall hyn arwain at ffraeo. Efallai dy fod di wedi colli rhywun, ac mae’r Nadolig yn gwneud i ti hiraethu mwy. Efallai nad oes gen ti neb i dreulio amser â nhw. Neu efallai nad wyt ti’n teimlo fel dathlu dim. Mae llawer o resymau pam nad yw pawb yn teimlo llawenydd dros gyfnod yr ŵyl.
Teimlo’n isel?
Gall hyn i gyd deimlo fel cwmwl mawr ddu drosot ti. Y peth olaf rwyt ti eisiau ydy gorfod peintio gwen ar dy wyneb a dathlu gyda theulu. Mae’r pwysau o deimlo fel y dylet ti fwynhau dy hun yn gallu achosi i ti deimlo’n fwy isel ac unig.
Os yw pethau’n teimlo’n ormod, cofia bod yna bobl gallet ti siarad â nhw. Nid yw’r llinell gymorth Meic yn cau ei ddrysau ar ddiwrnod Nadolig. Mae’r cynghorwyr yma o hyd i wrando, rhoi gwybodaeth, cynnig cyngor a gweithio gyda thi i ddarganfod ffordd i ymdopi. Rydym yn agored 8yb tan hanner nos bob dydd, ar ddiwrnod Nadolig a Dydd Calan hyd yn oed. Ffonia, tecstia neu sgwrsia gyda ni ar-lein yn gyfrinachol ac am ddim. Mae Meic yn rhywun ar dy ochr di bob tro. 💜
Os wyt ti’n teimlo fel nad wyt ti’n gallu ymdopi ac yn meddwl gwneud niwed i dy hun, rydym yn annog i ti siarad gyda rhywun yn syth. Mae’r Samariaid ar gael 24 awr y dydd, bob diwrnod yr wythnos. Gellir ffonio am ddim ar 116 123 neu e-bostio jo@samaritans.org. Os yw’n well gen ti siarad Cymraeg â nhw, yna mae gwasanaeth Cymraeg ganddynt rhwng 7yh a 11yh bob nos ar 0808 164 0123.
