Bod Yn Gyfaill: Sut i Gefnogi Ffrind ar eu Taith Tuag At Sobrwydd
Mae cefnogi dy ffrind drwy sobrwydd (sobriety) yn dangos dy fod ti’n ffrind da. P’un ai os ydynt yn cymryd seibiant o yfed neu’n ymrwymo i newid eu ffordd o fyw yn yr hirdymor, mae deall sut i fod yn gyfaill da yn gallu gwneud gwahaniaeth mawr. Dyma ychydig o gyngor i helpu ti gefnogi dy ffrind, heb bregethu na bod yn feirniadol.
Deall y daith
Mae sobrwydd yn newid mawr i fywyd rhywun sydd angen cryfder, dewrder a chefnogaeth gadarn. Gall fod yn anodd addasu i ffordd o fyw newydd, ac mae’n naturiol i ti a dy ffrind wynebu heriau. Bydda’n amyneddgar, paid â beirniadu a chofia bod llwybr bywyd pawb yn wahanol.
Trefnu gweithgareddau cymdeithasol heb alcohol
Un o’r ffyrdd gorau i gefnogi dy ffrind yw awgrymu gweithgareddau hwyl sydd ddim angen alcohol. Anghofia’r noson arferol o fynd i’r bar neu glwb nos a thrïa rhywbeth gwahanol. Beth am fynd i fynydda, gwylio cerddoriaeth byw, cynnal nosweithiau gemau bwrdd neu wirfoddoli? Drwy gynnig gweithgareddau fel hyn, rwyt ti’n eu helpu i gynnal bywyd cymdeithasol bywiog heb deimlo pwysau i yfed.
Cofia, mae’n bosib bydd bar mewn llefydd fel sinemâu a llefydd bowlio deg. Os oes dewis i brynu alcohol, peidiwch â chreu ffỳs am fynd i nôl diod ac annog gweddill dy ffrindiau i ddewis diodydd di-alcohol am y noson.
Paid â rhoi pwysau na chywilyddio neb
Mae’n hollbwysig i beidio rhoi pwysau ar dy ffrind i yfed neu godi cywilydd arnynt am beidio. Mae sylwadau fel “Mae un diod yn iawn” neu “Dwyt ti ddim yn hwyl yn sobor” yn gallu brifo a thanseilio eu hymdrech.
Hyd yn oed os wyt ti’n trio bod yn garedig, paid â phrynu diod alcoholig i dy ffrind os nad ydyn nhw eisiau un. Gofynna os ydynt eisiau diod meddal yn ei le.
Mae’n well osgoi gemau yfed ble mae pobl yn cael eu hannog i yfed gormod ac mae rhai sydd yn dewis peidio chwarae yn teimlo cywilydd am beidio cymryd rhan.
Does dim rhai i dy ffrind sobor fod yn dacsi
Er bod dy ffrind yn sobor does dim rhaid iddynt fod yn dacsi i weddill y criw. Mae awgrymu bod rhaid iddynt yrru yn gwneud iddynt deimlo’n wahanol i’r rhai sydd yn yfed. Paid â rhoi pwysau ar dy ffrind i gymryd cyfrifoldeb dros fynd a phawb adref, yn enwedig rhai sydd wedi cael gormod i yfed ac yn ymddwyn yn wirion. Trefnwch ffordd i bawb fynd adref yn ddiogel – fel edrych ar amseroedd bws neu archebu tacsi. Fodd bynnag, os ydy dy ffrind yn cynnig, mae hynny’n oce – ond sicrha mai ei syniad nhw ydi hyn ac nid dy syniad di.
Bydd yn ymwybodol o dy arferion yfed
Er bod dy ffrind yn dewis peidio yfed, does dim rhaid i ti beidio hefyd. Ond, mae yfed yn ormodol yn gallu gwneud i dy ffrind deimlo’n anghyfforddus, wedi cael eu gadael allan neu wedi eu temptio i yfed. Ystyria dithau gymryd seibiant o alcohol pan fyddi efo dy ffrind. Mae’n ffordd wych o ddangos cefnogaeth a mwynhau amser gyda’ch gilydd. Er enghraifft, os wyt ti mewn parti, gallet ti gael ychydig o ddiodydd di-alcohol neu ddŵr neu ddiod meddal.
Dathlu pob carreg filltir
Dathla pob carreg filltir mae dy ffrind yn ei gyflawni, dim bwys pa mor fach. Boed o’n wythnos, mis neu flwyddyn o sobrwydd, mae cydnabod eu llwyddiant yn gallu rhoi hwb i’w gymhelliant a’u hunanhyder. Mae gyrru neges destun, ffonio neu anfon anrheg bach yn golygu llawer i rywun ac yn ffordd wych o ddangos cefnogaeth. Gallet ti drefnu digwyddiad bach i ddathlu, fel mynd allan am goffi neu bwdin.
Addysga dy hun
Os nad wyt ti’n gyfarwydd â’r heriau o fod yn sobor, cymer amser i addysgu dy hun. Darllena lyfrau, gwylia raglenni dogfen neu gwranda ar bodlediadau am brofiadau pobl o fod yn gaeth i alcohol a’r gwellhad ar ôl hynny. Mae’r wybodaeth yma yn helpu ti ddeall profiad dy ffrind a chynnig cefnogaeth sydd yn fwy ystyrlon.
Mae gan sefydliadau fel Alcohol Change UK a Drinkaware wefannau sy’n llawn o adnoddau i roi arweiniad i ti.
Cynnig cefnogaeth emosiynol
Mae sobrwydd yn gallu bod yn amser emosiynol a chythryblus. Efallai bydd dy ffrind yn profi ystod eang o deimladau, o gyffro a gobaith i deimlo’n drist ac o dan straen. Bydd yno i wrando heb feirniadu, a phaid â disytyrru eu heriau neu gynnig cyngor diangen. Bydd yno i wrando a dilysu eu teimladau.
Os nad wyt ti’n siŵr beth i’w ddweud, gallet ti siarad â Meic. Bydd un o’n cynghorwyr yn gallu cynnig gwybodaeth, cyngor ac eiriolaeth i ti a dy ffrind. Galli di gael cymorth dros y ffon, neges destun a Whatsapp neu sgwrs ar-lein o 8yb i hanner nos bob dydd. Mae’r gefnogaeth yn gyfrinachol ac yn ddienw a gallet ti gael cymorth yn Gymraeg neu yn Saesneg.
